【now.com財經】經歷多次大熱倒灶後，終於成功「染藍」嘅Labubu母公司泡泡瑪特(09992)，更成功打破「染藍魔咒」，成為恒指新貴後，股價不斷破頂，今早(26日)一度高見339.8元，升4%，再創新高，市值衝破4500億元。
中金最新估計，3隻恒指新貴，除泡泡瑪特外，還有京東物流(02618)及中國電信(00728)，估計有最多資金流入係泡泡瑪特，由於集團一口氣晉身恒指及國指成分股，預期指數變動生效後，將會有4.5億美元及1.5億美元被動資金流入，折合共46.8億港元。
除咗資金湧入可繼續推升股價外，泡泡瑪特亦有另1個股價催化劑，就係主席兼CEO王寧帶埋去業績會嘅Mini Labubu，周四(28日)晚上10點會喺線上開賣，線下就會喺翌日(29日)，共有28個常規款，同埋2款隱藏，另有一個字母掛件系列，近日已經喺網上掀起炒風，原價79元一個嘅盲盒，索價220至230元，炒高近2倍，相信正式開售時，好大機會炒起埋公司股價，進一步推高市值。
