【Now財經台】騰訊控股(00700)交咗一份靚業績後，今日(14日)唔少遊戲相關股表現強勢，升幅介乎5%至近40%，其中，升幅最大係做網頁、手機遊戲開發、經營及發行嘅遊萊互動(02022)，股價今日高開近4%，開市報0.053元，已見咗全日低位，之後發力向上，尾市升幅一度擴大至57%，收市仍勁升逾33%，報0.068元，全日成交股數較過去100日同時段平均大增37倍，全日成交金額近270萬元。
遊萊互動一向消息唔多，股價亦落後，過去5個財政年度都要蝕錢，今日升勢可能係受惠於騰訊業績理想，帶動遊戲股齊齊有得升。
遊萊互動股價今日升得好急，有一定回調壓力，值得留意係，集團股價偶爾會喺冇消息下，突然喺大成交下異動，去年6月曾經試過單日飆逾1倍，更試過5日內累升1.6倍。
