【Now財經台】兩隻國產晶片股中芯國際(00981)及華虹半導體(01347)業績後齊齊受壓，上季少賺19%嘅中芯，股價今日(8日)一度重挫逾8%，雖然華虹上季多賺19%，但股價曾跌近4%，兩份業績都差過預期，當中有咩值得留意？
信達國際研究部助理經理陳樂怡指，雖然兩隻股份第2季業績都差過市場，但華虹第2季仍能受惠於加價所帶嚟嘅正面影響，加上兩家公司正在提升產能，喺規模效應下，華虹開支控制得好，所以毛利率表現好過中芯，增長動力更強。
Tracy補充，市場分析晶片股時，主要睇毛利率、產能使用率及資本開支周期，整體而言，中芯都差過市場預期，加上集團下半年指引比較含糊，所以好難畀到驚喜市場，股價調整幅度亦較大。
