【Now財經台】截至早上11時止，過去1小時內《彭博》用戶搜尋量最多港股，依次為比亞迪股份(01211)、創科實業(00669)、中芯國際(00981)、中國平安(02318)及藥明生物(02269)。
車股今日(30日)受壓，相信同理想汽車(02015)SUV新車「i8」最終定價低過預售價有關，因為市場憂慮車企又再「內捲」，「i8」定價對市場有咩啟示？點睇車企前景？
紅蟻資本投資總監李澤銘指，一般而言，市場都歡迎定價較低嘅新車，但理想今次先公布預售價，接受預訂後，售價最終更平，可能會令市場擔心銷情唔好，所以最終售價要較預售價大減10%至20%。
Alan又話，由於中央堅決「反內捲」，唔少車企已取消部分優惠，令新能源車價格逐步重返正常水平，不過，新能源車受歡迎主要係有補貼及售價較平，所以當價格上升時，就會影響銷情，佢估計，內地新能源車下半年銷售會比上半年差，車股股價仍有向下風險。
