【Now財經台】美元兌十國集團(G10)貨幣轉弱，但港元持續弱勢，港匯上周五(4日)再觸及7.85弱方兌換保證水平。1個月拆息今日(7日)回升至1厘以上，創1個月新高，「收息一族」除咗定存，上半年表現突出嘅高息股，下半年值唔值得入手？
獨立市場策略師何啟聰指，近期高息股已累積唔少升幅，尤其6月開始，本港及內地步入低息期，當股價升到咁上下，投資者就會開始睇高息股嘅前景穩定性，其中，內銀股仍相對強勢，其中，建設銀行(00939)仲破緊頂，資源類股份如油股就較為中性。
Ivan建議，揀收息股可以睇息率係咪仍有近5厘水平，由於拆息回升，若港元定存可以回復2厘至3厘水平，同水平嘅高息股就慎入。此外，亦要留意心儀嘅高息股業績，下半年會唔會受中美關稅影響，佢認為，內銀及內險股係較穩陣嘅選擇。
