【Now財經台】周一(26日)傳出比亞迪股份(01211)推出「618」優惠，22款車減價最多34%，市場擔心價格戰升級，之後又傳集團山東經銷商爆煲，拖累股價今個星期跌足5日，而長城汽車(02333)董事長魏建軍嘅言論，惹嚟市場揣測比亞迪會唔會變成「恒大2.0」，睇返比亞迪首季業績，負債比率約70%，利潤又跌緊，情況會唔會令人擔心？集團隱性負債似乎亦不少，會唔會影響埋供應商，出現「火燒連環船」嘅情況？
亨達財富管理董事總經理姚浩然認為，比亞迪情況未去好嚴峻，而公司情況亦同恒大唔同，內地樓市本身供過於求，恒大主攻內地，比亞迪已逐步拓展海外市場，集團期望至2030年外銷佔50%，若比亞迪可以擴大海外市場，抗衡「內捲」之餘，亦可減低風險。
Patrick又指，比亞迪所需嘅零件及產品數量較大，供應商會提供較長付款周期，相信減價促銷某程度上係希望套現找數，今次減價嘅車款好全面，反映集團存貨唔少，加上舊車款之後更難賣出，所以希望透過今次減價盡快去貨，即使今次減價導致利潤減少，但可以套現找供應商嘅數，佢認為出現「火燒連環船」機會較微。
