【Now財經台】中央再出重拳救市，內房相關股今日(7日)普遍造好，但碧桂園服務(06098)逆市向下，今朝高開後，好快就轉跌，一度挫近6%，低見6.61元，成交股數較過去100日同時段增近2倍，暫時成交金額逾2.2億元。
碧服今日逆市跌，因為傳出不利消息，公司今日開市前公布，向非執董及主要股東楊惠妍借出10億人仔，呢筆錢會轉借畀碧桂園(02007)境內附屬，用喺保交樓相關事項。
今次貸款屬於關連交易，貸款最終會喺母公司碧桂園手上，但母公司又陷財困，借出嘅錢係咪可以順利收返，可能投資者始終有戒心，導致股價今日一口氣失守10天及20天線。
後市要留意失守保歷加通道中軸後，通道底約6.4元水平有幾大支持力度，依家RSI落到50水平，留意短線係咪會有反彈，同埋市場對中央最新推出嘅救市「組合拳」有幾受落，係咪可以刺激樓市銷售。
