【Now財經台】內地新能源車企陸續派4月交付成績表，多隻新能源車股今日齊「踩油上」，龍頭比亞迪股份(01211)尾市一度升3.3%，高見382.6元，交付量按年增長最勁嘅小鵬汽車(09868)及零跑汽車(09863)午後再升多浸，係咪大市氣氛都係其中一個幕後推手？點睇車企4月嘅交付量？
紅蟻資本投資總監李澤銘指，雖然未有4月整體交付數據，但估計按年計係跌緊，新能源車佔比會持續上升，按年錄雙位數升幅，加上各車企交付量升幅較整體大，意味上市車企喺整體市場嘅佔有率上升，繼而擠壓小型或冇上市嘅新能源車企。
Alan續指，連比亞迪呢啲本身高基數嘅車企，都可以實現雙位數增長，所以佢估計市場反應正面，而市況亦好重要，由於呢兩日冇北水，所以個市夠乾，夾起上嚟會更得心應手。
