【Now財經台】納斯達克中國金龍指數(HXC)已連升4日，市場似乎唔再擔心中概股除牌風暴，另一方面，唔少大行認為，如果呢啲大型中概股嚟香港上市，港交所(00388)將會係大贏家，邊隻中概股最大機會嚟香港掛牌？此外，港交所昨日(24日)宣布，斥資63億元向置地購入交易廣場多層樓面做永久總部，雖然租金開支少咗，但可能對收入有影響，但長遠係咪都屬於正面？
博威環球證券金融首席分析師聶振邦指，有中概股嚟香港上市，市場都會解讀為利好消息，如果係市場熟悉嘅公司，對港交所幫助更大，參考返高盛預測，未來可能有27隻中概股在港上市，例如拼多多、亞朵、陸金所及富途等，絕對有利港交所嘅首次公開招股(IPO)生意，亦對港交所維持全球集資前列位置有好大幫助。
聶Sir又指，港交所買交易廣場物業，短期或會對收入有影響，但物業估值係會提升，長遠會對收入有幫助，相信市場會認為呢個消息係正面。
