【now.com財經】《100毛》母公司，2018年喺本港主板上市嘅毛記葵涌(01716)，上周五(6日)開市前突然停牌，惹嚟唔少揣測，最終由公司開估，就係計劃賣盤。
集團兩名創辦人擬折讓逾40%，出售65%股權，套現逾1.2億元，每股平均價0.6963元，至於買家身份，據港交所(00388)資料顯示，英文名字係普通話拼音「Ma Liyang」。
其實毛記賣盤都唔意外，因為公司業績近年已跌到好殘，加上廣告市道低迷，如果有人肯接貨，即使折讓咁大，賣盤對兩名創辦人嚟講可能都係一個唔錯嘅選項。
毛記葵涌當年上市價1.2元，首掛當日一度炒上11.76元，勁升逾8倍，上周五停牌前報1.21元。
消息傳出後，唔少人都問一個問題「到底係賣盤定變殼？」，如果借殼上市可以唔使再搞IPO，慳返一筆之餘又簡單，但由於未有正式通告，暫時都好難講。依家另一個關注點係毛記復牌後，股價會點行，呢個就要睇實。
