【Now財經台】截至早上11時止，過去1小時內《彭博》用戶搜尋量最多港股，依次為小米集團(01810)、舜宇光學科技(02382)、比亞迪電子(00285)、耐世特(01316)及比亞迪股份(01211)。
美國總統特朗普(Donald Trump)昨日(24日)預告，短期內會公布有關汽車關稅嘅措施，刺激Tesla股價大反彈，點知作為Tesla概念股嘅耐世特，今日(25日)竟然不升反跌，係咪反映緊對關稅嘅憂慮？股價調整完未？
紅蟻資本投資總監李澤銘指，特朗普嘅目標好清楚，就係希望所有生產線搬返美國境內，但因為耐世特嘅生產線主要集中喺南美洲，所以喺環球分工嘅情況下，即使成品係賣去美國，車廠都會係設立喺南美同墨西哥。佢話，對耐世特而言，一係喺用較多資金喺美國設廠，一係就要面對高昂關稅同訂單下跌風險，所以當昨晚嘅對等關稅(Reciprocal Tariff)政策更清晰後，市場對耐世特有憂慮。
Alan續指，耐世特大機會下試低位，即5元水平，建議可以跌至接近低位再考慮博反彈。
