【Now財經台】華潤飲料(02460)今日(21日)派咗上市後首份成績表，去年多賺23%，毛利率升至47.3%，末期連特別息合共派0.483元人仔，相比同業如農夫山泉(09633)、中國旺旺(00151)，華潤飲料毛利率較低，未來有幾大提升空間？
紅蟻資本投資總監李澤銘表示，華潤嘅成本控制好咗，加上呢份業績唔使再計埋上市費支出，所以整體利潤增速快過收入，毛利率亦明顯改善，喺規模效應下，又有各種降本增效策略，由於一次性開支減少，就推高咗毛利率。
Alan又指，華潤飲料唔單止要提升規模效益，亦要留意品牌定位、定價及產品多元化，現時集團飲用水收入佔90%，農夫山泉飲用水佔整唔夠40%，農夫山泉毛利率高主要受惠於其他高定位產品，而旺旺嘅產品都係高定位、高定價及高毛利，所以，如果華潤飲料想提升毛利率，就要喺降本增效之餘，進一步調整品牌定位及定價。
