【Now財經台】騰訊控股(00700)昨日(19日)收市後派咗去年成績表，其中，去年第4季所有指標幾乎都好過預期，集團又宣布今年計劃斥資最少800億人仔回購，上季資本性支出(CAPEX)大增近4倍至逾360億人仔，用嚟發展人工智能(AI)，騰訊對AI嘅投資會唔太大？對整體業務發展係咪正面？
鴻鵠資產管理行政總裁陸庭龍指，騰訊幾條大數及增加派息都係正面消息，加上持續做回購，整體表現唔錯。Alan續指，DeepSeek出現後，騰訊同其他內地科企一樣，都加大AI投資，加上騰訊係科企龍頭，所以做法係符合市場預期。
佢又稱，雖然騰訊交咗一份亮麗嘅成績表，仍要留意未來係咪繼續有資金流入，維持到依家嘅投資氣氛。Alan續指，暫時推動大市嘅資金主要來自內地及亞洲，歐美唔係一個主流，因此，如果未來吸引到海外資金流入港股，可以進一步推高大市。
