【Now財經台】據《彭博》昨日(4日)引述消息指，市傳名創優品(09896)考慮分拆旗下玩具品牌TOP TOY喺香港上市，集資逾20億元，名創喺2020年底創立TOP TOY，賣盲盒、積木及手辦等產品，同Sanrio、Bandai、Marvel等大IP有合作，亦有同內地及海外唔同藝術家合作，似乎想挑戰賣盲盒賣到市值超過1500億元嘅泡泡瑪特(09992)。
不過，睇返泡泡瑪特股價，似乎唔怕有人挑戰佢，加上公司最新推出嘅「The Monsters X One Piece」，吸金王Labubu變身《海賊王》角色，呢套盲盒一出，POPMART嘅門市又大排長龍，1盒難求，又帶挈股價炒返轉，泡泡瑪特股價今日(5日)一度高見117元，大升7.6%，相信要見120元都冇難度。
