【Now財經台】截至早上11時止，1小時內《彭博》用戶搜尋量最多港股，依次為中國移動(00941)、東風集團(00489)、黑芝麻智能(02533) 、比亞迪股份(01211)及美團(03690)。
黑芝麻股價上周因為同比亞迪合作發展智能駕駛而爆升，但股價今日(10日)急瀉，主要受基石投資者股份解禁拖累，黑芝麻回調後，係咪可以重新發力再上？集團扭虧轉盈，有概念又有錢賺，長遠係咪值得睇好？
富昌證券聯席董事譚朗蔚指，基本面方面，黑芝麻發展嘅智駕係大趨勢，加上公司成功扭虧為盈，所以業績方面唔使擔心。佢又話，黑芝麻呢類半新股要留意係，上市半年後原始股東禁售股解禁，呢方面必須留意，因為呢批股份可以令股價大上大落，所以要留意始創人或股東會唔會承諾唔減持，否則，股價短線仍會受解禁因素影響。
佢續指，黑芝麻股價喺25元一個重要分水嶺，如果經歷解禁憂慮嘅震盪後，仍守得住呢個位，後市可以繼續觀望。
