【Now財經台】獅騰控股(02562)股價今早(23日)高開逾3%後，升幅逐步擴大，一度升逾14%，高見28.35元，中午前成交股數較過去100日平均增1.5倍。
獅騰今日開市前出通告，計劃收購1家內地大數據及數字化轉型平台公司100%股權，並已訂立1份冇約束力意向書，但未有披露作價。公司近期都幾多動作，同LG電子又合作外，又同幾家媒體、製作公司合辦1個有關直播主播嘅創新真人Show，但全部都冇提及金額，所以合作對業績有幾大幫助都係未知數，值得留意係，公司手頭現金只有約790萬元，所以有機會要「抽水」，集資完成收購及合作。
股價方面，獅騰喺2024年10月底完成特殊目的收購公司併購交易(De-SPAC)，首掛當日股價好Chok，去年底曾經出現一輪升浪，由11元炒上50元水平，累升3倍，不過，近期又落返20元水平，以高位計，股價已經「腰斬」。近日明顯見到有「春江鴨」出沒，成交都多返啲，連日收復咗幾條移動平均線，但股價要再上，就要睇後市有冇資金跟進。
