【Now財經台】發改委今日(8日)公布加大補貼力度撐內需，又話為咗回應民眾嘅期望，正式將手機等3類數碼產品納入消費品「以舊換新」，將按售價15%提供補貼，每名消費者每類產品可補貼1件，補貼上限500人仔。不過，手機設備股冇反應之餘，舜宇光學科技(02382)及瑞聲科技(02018)股價更大冧逾7%，係咪因為補貼太少？
南華金融集團副總裁莫灝楠指，係因為呢項補貼有太多限制，例如消費者買6000人仔以下嘅數碼產品先有補貼，但其實好多產品售價都超過6000人仔，令受惠嘅人唔多，另一方面，如果消費者本身都係買緊約10000人仔嘅產品，呢類消費者都唔會在意呢500人仔補貼，佢認為，中央今次主力幫消費力較低嘅市民。
Casper又話，政府忽略咗市場上一次嘅換機潮喺2021年至2022年，相隔唔係好耐，消費者未必需要換機，加上500人仔嘅補貼好難增加消費意欲，雖然補貼對整體消費會有幫助，但對手機相關企業嘅業績冇太大支持作用。
