【Now財經台】截至早上11時止，過去1小時內《彭博》用戶搜尋量最多港股，依次為騰訊控股(00700)，商湯(00020)、中國海洋石油(00883)、中遠海控(01919)、中銀航空租賃(02588)。
騰訊被美國國防部列入「軍工黑名單」，但大行普遍認為，騰訊可透過同美國國防部合作解決誤會，不過，由於美國侯任總統特朗普(Donald Trump)就快上任，投資者反應都會較敏感，騰訊股價今日(7日)大冧，可唔可以趁低買貨，還是再睇定啲？
富途證券首席分析師譚智樂指，大行普遍建議投資者趁低吸納，係預期騰訊最終冇事，但佢認為，投資者唔使太心急入貨，大行嘅睇法係偏中長線，佢哋睇1年後目標價會高過現價，但騰訊股價今日急瀉7%，呢浸沽壓短線會唔會持續，繼而令騰訊出現深度調整？睇返技術走勢，騰訊今日似乎冇反彈跡象，就算集團澄清誤會，最少今個月初期都會有影響，所以資金未必肯去追。
Arnold又話，短期內，市場對中美關係嘅憂慮，好大機會困擾資產價格表現，所以唔排除短線沽壓會較大，除非消息出現180度轉變，到時再考慮博反彈。
