【Now財經台】2024年千億市值、派3厘息以上表現最好嘅高息股中，涉及唔少行業，包括內銀、基建、零售、工業股，其中，銀行股整體業務唔錯，帶挈股價造好，此外，唔少本地地產股都上榜，呢兩類股份喺2025年係咪值得買入？
香港大學房地產及建設系客席副教授楊書健指，全球銀行股喺2024年造好，主要係去年係息口嘅高原期，首先令銀行息差擴大，銀行可以從中賺多咗錢，其次係息口處於高原期，令銀根收緊，資金供應收緊會令銀行嘅借貸業務做好，可以收取更高嘅息率，所以全球及本地銀行都受惠，其中，滙豐控股(00005)、恒生銀行(00011)及中銀香港(02388)股價都向上，如果2025年減息幅度唔大，息口繼續處於高原期，銀行股今年會繼續有好表現。
Victor又話，本港樓價繼續處於低位，但似乎開始見底，本地地產股股息吸引，股息回報仲高過商舖租金回報，意味本地地產股相對較平，若投資者認為樓價未來會平穩向好，可以考慮入手地產股，因為高息率有一定防守力。
