【Now財經台】騰訊控股(00700)旗下微盟集團(02013)股價昨日(19日)狂飆35%，主要受微盟小程序接入微信小店消息刺激，今日再傳嚟微信最新測試「送禮物」功能，微盟股價今日(20日)繼續掃高，兩日累升約60%。微盟分佣嘅商家解決方案佔整體業務近40%，據大行估計，呢部分業務有80%來自騰訊旗下微信，如果微信新功能掀起熱潮，微盟嘅收入係咪可以受惠？
紅蟻資本投資總監李澤銘指，如果騰訊重返電商，又成功搶到阿里巴巴(09988)及京東集團(09618)等電商份額，一定會利好微盟，如果騰訊成功重返電商市場，進駐騰訊嘅小商家就會受惠，而呢啲商家都係微盟嘅客戶，間接利好微盟。至於騰訊再戰電商會唔會成功，就視乎新推出嘅微信小店「送禮物」功能，可唔可以改變大眾消費習慣，佢估計，「送禮物」推出初期會因為新鮮感而受歡迎，但長遠而言，對消費模式未必有好大影響。
Alan又話，內地電商發展已經好成熟，市場穩定之餘，競爭亦開始白熱化，如果冇龐大嘅補貼，好難再喺市場搶到一定份額，佢唔認為騰訊會投入好多資金做補貼，所以單靠「送禮物」功能，其實好難扭轉電商平台消費習慣。
