【Now財經台】海昌海洋公園(02255)股價今日(18日)平開後，隨即急挫，開市唔夠10分鐘，股價一度低見0.44元，急瀉逾31%，跌至逾3年低位，成交金額逾1億元，成交股數較過去100日同時段平均激增23倍，14天相對強弱指數(RSI)已經跌至20以下，現處於17嘅嚴重超賣水平。
海昌海洋公園最近出過澄清公布，不點名回應外電傳聞，明確否認出售資產，又話控股股東無意私有化公司，但控股股東以公司利益最大化為原則，不時審視進一步優化股東及資本結構嘅機會，市場認為唔排除會引入中旅或出售股權等可能性。
海昌海洋公園14天RSI已跌穿20，睇返2023年及2022年底股價兩次閃崩，14天RSI都落到20樓下，但閃崩後股價呈橫行格局，未見出現大反彈，喺股價大跌原因不明下，投資者似乎暫時都唔好諗撈底博反彈。
