【Now財經台】比亞迪股份(01211)第3季度營收首次超越美股「科技7雄」(Magnificent 7)嘅Tesla，但市場反應麻麻，股價今朝(31日)低開1%，其後跌幅一度擴大至逾5%，不過，今朝成交活躍嘅CALL，4月到期，價外40%，槓桿6倍，行使價介乎410至416元。不過，比亞迪股價近幾年高位都只係328元，點解咁多人揀呢類產品？
中信里昂股權衍生品銷售經理李佳原指，好多投資者都係著重輪證嘅槓桿及敏感度，包括價格跳動程度等因素，雖然行使價係其中1個重要因素，但值得留意係，投資者普遍都利用輪證做短中線部署，唔會揸到到期或到期結算，因此，即使股價未到400元就破頂影響都唔大，只要投資者揀啱邊，輪證理論價格有升幅，成功帶動正股價格令投資者可以低買高沽就可以。不過，實際槓桿6倍已經係市場上熱門選擇之中最高嘅一批，令今朝有較多資金流入CALL輪。
