【Now財經台】據研究機構Counterpoint Research發表嘅研究報告顯示，小米集團(01810)8月以全球手機實際銷售計算嘅市佔率，超越蘋果公司(Apple Inc.)排第2位，係3年以嚟首次。Apple可唔可以靠iPhone 16系列扭轉劣勢？小米成功爬Apple頭係咪短期情況？
博威環球證券金融首席分析師聶振邦指，每家公司出新手機後都會加價，消費者就會考慮性價比，由於人工智能(AI)屬於嶄新功能，所以未必會好頻密換機，會等真係有AI功能先買，佢認為，小米市佔率短期有機會持續高過Apple，但明年會因為AI呢個因素令iPhone變得較吸引，到時Apple市佔率好大機會再度超越小米。
聶Sir又話，新機發布、搶佔印度、拉丁美洲等市場，呢啲利好消息都會推高小米股價，有望重返2021年水平，即 30元以上水平，但估計現時喺23元有較大阻力。佢又提醒，若大市表現好，恒生指數可以突破19000關，小米股價才有機會突破23元，有貨嘅投資者可以部署22元至23元先食糊，20元樓下可以吸納。
