【Now財經台】港交所(00388)股價昨日(19日)抽升逾5%，今早(20日)再高開，暫時已連升第3個交易日，今朝突破240元關口，一度高見243.6元，升2.2%。美國聯儲局宣布減息，刺激港股昨日成交大升，市場擔唔擔心利好作用短暫，多唔多投資者反手開淡倉？
星展香港環球金融市場上市產品主管周國威指，港交所資金流部署同大市有啲相似，對上兩日好倉心急食糊，淡倉就連續3日有資金流入，其實港交所股價已積弱一段時間，昨日明顯出現1支大陽燭，突破咗240元呢個心理關口，並收復多條移動平均線，短線走勢好轉，所以淡友宜再睇定啲。
佢又話，如果堅持睇淡，博港交所短線急回，可以留意，11月底到期，價外約10%嘅貼價PUT，槓桿約15倍，用呢類高槓桿產品好處係可以縮細注碼。
