【Now財經台】今年焦點新股，內地家電龍頭美的集團(00300)今日(17日)首掛冇令捧場客失望，收市較招股價炒高近8%，不過，影子股海爾智家(06690)及海信家電(00921)就要跌，家電股之前大炒「以舊換新」政策，未來會唔會繼續利好美的業績？
信達國際研究部董事趙晞文指，唔排除資金會轉投美的，因為要揀市值大、有流動性又硬淨嘅H股家電股，選擇其實唔多，美的今次公開招股超額認購逾4倍，若有機構投資者喺國際配售攞唔夠貨，可能要等H股正式上市後再買貨，因為睇返預測市盈率(PE)，美的定價對比海爾智家嘅估值係有折讓，對機構投資者來講，美的會有吸引力。
晞文續指，依家美的同海爾智家2025年預測PE差唔多，而10倍嘅預測PE相對一般家電股嘅估值已經算唔錯，但佢提醒，未來要留意美的嘅增長動力，因為美的及海爾智家有部分業務來自內地，而家電股喺房地產產業鏈中屬於較後嘅行業，不過，若內地政策配合到，或海外增長動力大，中長期而言，美的估值有潛在提升空間。
