【Now財經台】截至早上11時止，1小時內《彭博》用戶搜尋量最多港股，依次為藥明生物(02269)、華潤啤酒(00291)、百威亞太(01876)、太古地產(01972)及長實集團(01113)。
藥明康德(02359)昨日(30日)出咗上半年業績後，藥明系股價連續第2日造好，今日(31日)升得更靚，一度升逾8%，高見32.45元，雖然集團上半年盈利倒退，但仍維持全年目標指引，市場對下半年業績都睇得樂觀，係咪中美關係緊張都唔會對藥明康德有太大影響？
資深證券分析師彭偉新指，藥明康德出完業績後，獲好多券商唱好，集團維持全年目標指引，所以下半年增長有機會加快，繼而睇好下半年業績。佢又話，過去一段時間呢類股份嘅股價都跌咗好多，喺低基數效應下，藥明系股價今日大升絕對唔意外，後市要留意集團可唔可以交出一份靚仔嘅成績表，若第3季業績唔對辦，投資者就會掟貨，拖累股價向下。
