【Now財經台】三中全會結束後，可能政策憧憬落空，加上受外圍拖累，恒生指數連跌3日後，今日繼續打17000關攻防戰，250天牛熊線亦危危乎，重磅股方面，依家只得騰訊控股(00700)頂得下，到底港股會跌到邊個水平，幾時先值得吸納？此外，「中特估」概念股都有沽壓，獲利盤開始湧現，其中，中國聯通(00762)今日(26日)一度挫逾7%，呢類股份係咪唔應該再沾手？
冠域商業及經濟研究中心主任關焯照指，港股最值得入手喺16000至16200點，騰訊係造返好啲，但其實之前跌咗唔少，不過，佢仍睇好騰訊，指343元有一定值博率。佢又提醒，港股業績期快到，個別股份喺下個月可能有意外發揮。
至於關博士之前一直睇好嘅「中特估」概念股，佢依家都唔建議沾手，因為上半年造好嘅電力股、電訊股及油股，最近都守唔住，因此，建議投資者等業績期展開，等內地電訊股等沽完先再買入。
