【Now財經台】國際油價連日向下,拖累「三桶油」涯沽,其中,中國海洋石油(00883)今日(17日)收市跌5%,成交金額逾51億元,「Trump Trade」成為市場近日熱話,理應有利油價,但油價又彈唔起。油股大幅回落,加上維持高息率,係咪已經有一定吸引力?
元宇證券投資總監林嘉麒指,雖然油股近日大跌,但投資者仍可留意「Trump Trade」及息率開始吸引,變相令油股前景好轉,佢提醒投資者可以開始重新部署,但短期仍然要捱價。此外,市場擔心內地經濟增長不似預期,但其實內地第2季經濟增長維持約5%,只要下半年增長平穩,而內需亦有機會回暖,所以現階段唔使太擔心石油需求大減,加上美元轉弱都會利好資源價格。
KK建議,投資者可留意營運狀況較佳嘅中海油會唔會有價值體現,以現價計息率有6厘至7厘,加上市場預期集團今年盈利增長逹20%,可以考慮做中長線部署。