【Now財經台】截至早上11時止，過去1小時內《彭博》用戶搜尋量最多港股，依次為中國石油股份(00857)、中國石油化工股份(00386)、中國海洋石油(00883)、建設銀行(00939)及新奧能源(02688)。
中石油昨日(26日)已出咗業績，上半年多賺近4%，派中期息0.22元人仔，另一方面，利比亞東部政府暫停原油生產，加上中東局勢緊張，刺激油價昨晚(26日)升3%，中石油股價今日(27日)一度升逾5%，高見7.23元，到底邊個先係中石油股價嘅「幕後推手」？股價仲有幾多水位？
大華繼顯執行董事梁偉源指，油價喺今年第2季呈上落市格局，紐約期油喺每桶70至80美元上落，未見出現明顯突破，令油股冇辦法向上突破。佢又話，近期油價急升推高油股股價，所以同業績及憧憬冇關。
不過，油價受制於全球經濟增長放慢，石油需求難有太大增長空間，因此，油價好難衝破80美元阻力，估計油股後市會喺現水平上落。
