【Now財經台】截至早上11時止，1小時內《彭博》用戶關注度上升最多首5隻港股，依次為龍湖集團(00960)、領展房產基金(00823)、恒基地產(00012)、新世界發展(00017)、中國鋁業(02600)。
美國昨晚(11日)出咗通脹數據後，9月減息預期急升溫，摩根大通亦預測美國減息時間，由原來11月調整至9月，若美國9月真係減息，內地人民銀行減息彈性會唔會大咗？不過，人行年初已下調5年期中期借貸便利(MLF)利率，內地樓市始終未明顯復甦，息口對樓市刺激作用有限，係咪都要等經濟有起色先救到樓市？內房股今日炒起係咪純粹趁港股大升市反彈？
大華繼顯執行董事梁偉源指，其實美國減唔減息對內地經濟影響唔大，所以人行減息機會唔會因此而增加，佢又認為，人行未來有機會降準。Steven又指，內房股今日炒上同美國減息因素冇關，反而同下周開幕嘅三中全會有更大關係，不過，可以推出嘅政策其實之前都推過，即使依家再推都作用唔大。
內地樓市方面，Steven指，內房銷售仍未有起色，而個別民企內房債務重組問題仍未解決，相信內房需要一段較長時間才能復甦。
