【Now財經台】新鴻基地產(00016)及恒基地產(00012)兩隻地產龍頭，股價喺8月都升得唔錯，係表現最好首5隻高息股之一，若美國聯儲局今個月真係開始減息，現時市場估計減息步伐會係循序漸進，未必會好急。不過，新世界發展(00017)因資產減值損失導致要發盈警，拖累股價今日(2日)急挫，本港樓市前景仲值唔值得睇好？
安泓投資總監兼香港大學房地產及建設系客席副教授楊書健指，以本港地產借貸成本嚟計，過往市民買樓傾向造最優惠利率(Prime Rate)按揭，即P按，但依家較多造港元銀行同業拆息(HIBOR)按揭，即H按，依家大部分人都揀H按，借貸成本較以前低，加上樓市仍有剛性需求，市民下半年「上車」會更易。
Victor又指，新世界減值虧損主要指集團長期持有嘅商業地產減值，對發展商嚟講，短期最緊要係賣到樓，貨如輪轉，所以現時手上有現樓可以賣嘅發展商會相對有利。
