【Now財經台】內地今日(3日)傳出萬億級消費稅改革嘅消息，奢侈品、高檔服務有機會搶閘成為試點，消息炒起A股多隻百貨、零售及免稅品概念股，港股就有中國中免(01880)，股價一度勁升逾16%，喺未知改革詳情下應該點部署消費股？名牌及珠寶金飾股係咪會率先跑出？
南華金融集團副總裁莫灝楠認為，其實消費稅改革同下游嘅消費、零售行業關連性唔大，因為主要向批發層面徵稅，所以稅款已包含喺貨品中，直接轉嫁畀消費者，屬於「價內稅」，雖然減消費稅可以降低中間批發及廠商成本，但暫時仍未知道減幅，加上徵稅範圍有機會擴大，所以消費稅改革到底係利好，還是利淡仍然係未知之數。
Casper又指，高檔消費股本身郁動空間唔大，雖然呢啲高檔消費股如周大福(01929)，喺內地市場有一定佔比，但大部分銷售來自香港及海外，所以減稅未必對呢啲公司有太大利好作用，而減稅最直接影響到免稅店如中免，Casper建議等消息落實再做部署都唔遲。
