【Now財經台】激光雷達生產商速騰聚創(02498)獲納入恒生綜合指數，股價今日(20日)近乎平開後，升幅不斷擴大，一度狂飆近90%，高見79元，創新高，不過，截至上午11時20分止，成交股數僅10萬股，但由於平日成交唔多，因此，已較過去20日同時段平均成交激增65倍。
速騰聚創今日價量齊升，相信係憧憬有機會畀北水睇中，中金預期，速騰聚創將透過快速納入機制，被納入港股通名單，速騰聚創今年1月上市，依家阿里巴巴(09988)持股10%，集團約70%收入來自銷售激光雷達產品，用於高級駕駛輔助系統ADAS，客戶都係知名車廠及機器人製造商。
速騰聚創股價今日急升，但其實公司盈利能力麻麻，日線圖嘅上影線好長，小心短期有回套壓力，未來潛在風險係上市時引入嘅基石投資者南山戰略新興產業投資嘅4%持股，禁售期係半年，即7月5日就會解禁，依家股價上返水面，可能成為沽貨誘因。
