【Now財經台】截至早上11時止，1小時內《彭博》用戶搜尋量最多港股，依次為小米集團(01810)、龍湖集團(00960)、瑞聲科技(02018)、聯想集團(00992)及恒隆地產(00101)。
小米股價今日(8日)一度升7.7%，逼近20元關口，衝上逾2年高位，而集團月底出業績前獲兩家大行唱好。
瑞銀估計，小米首季經調整利潤增長50%至49億人仔，中金則預期，小米多賺70%至55.2億人仔。小米5月23日派成績表前係咪仲有得炒？有冇機會突破20元？
資深證券分析師彭偉新指，小米股價今日大升，主要係獲大行唱好，但理據有不足之嫌，雖然汽車銷量唔錯，但產能方面存在好多不確定性。佢又話，雖然小米第1季收益升幅強勁，但第2季打後表現唔明朗，手機及汽車作為短期推動力，但利好因素被過分放大，若股價上到20元水平要更小心，又估計股價在業績前有機會見頂，現階段入場已經太遲。
