【Now財經台】截至早上11時止，1小時內《彭博》用戶搜尋量最多港股，依次為中國海洋石油(00883)、中遠海控(01919)、中國石油化工股份(00386)、中國財險(02328)及中銀香港(02388)。
中國石油股份(00857)首季多賺5%，中海油盈利就增長23%，但油價踏入4月一直向下，油股第2季業績能唔能夠延續升勢？
富途證券高級策略師譚智樂指，油股表現其實同油價關係唔大，資金追捧油股主要係業務表現及派息穩健，加上國企分紅政策清晰及盈利能力穩定，即使油價回調，但開採成本持續穩定，所以作中長線收息係冇問題。
Arnold又指，中石化主攻下游業務，但相關業務嘅優勢要等油價回落至60美元先會浮現，現階段化工、煉油等成本似乎短期內都無法轉嫁到，雖然中海油派息及盈利能力比較清晰，但估值約1.2倍市帳率(PB)相對較高，建議攞返個平衡，中石油0.8倍PB會舒服啲。
