【Now財經台】明日(30日)將會有6隻虛擬資產現貨交易所買賣基金(ETF)喺港交所(00388)掛牌，包括亞洲首批比特幣(Bitcoin)及以太幣(Ether)現貨ETF，全部設有港元及美元櫃枱，部分產品更設有人仔櫃枱，依家本港已經有Bitcoin及Ether期貨ETF，相比之下現貨ETF有咩優勢？
華夏基金(香港)業務拓展部高級經理李星宇指，現貨ETF價格中長期上可跑贏期貨ETF，因為期貨ETF嘅底層資產會以Bitcoin期貨模擬ETF價格，如果以期貨模擬價格會因每個月都要轉倉、期貨價格遠期貴過近期等因素，因而產生成本。佢又話，如果以本港第1隻虛擬貨幣期貨ETF，由上市至今年3月31日計算，現貨ETF跑贏約50%，意味Bitcoin升咗2倍，但期貨ETF只升咗1.5倍。
李星宇又話，若參考美國例子，產品推出後有唔少投資者轉戰現貨ETF，因為可以減省成本，亦可以更準確追蹤虛擬資產價格。
