【Now財經台】停牌逾兩周嘅華音國際控股(00989)今午(14日)復牌，停牌前報0.042元，午後一度抽高至0.133元，爆升2.16倍，衝上約1個月高位，一度重返「毫子股」，但其後升幅收窄，收市報0.095元，飆1.26倍。
華音中午公布，以約19%溢價，即每股5仙，向廣澤投資控股發行共50.6億股，用嚟抵銷附屬公司約2.3億人仔貸款。廣澤投資由華音主席兼大股東崔薪瞳父母持有，被視為一致行動組別，簡而言之，主席崔薪瞳家族以債轉股增持公司股份，持股量將由30.95%升至59.45%，進一步鞏固大股東地位。
過去1年，華音股價大跌約80%，依家仍處於低位，債轉股這筆數冇抵押又免息，只需明年2月底前償還，依家提早償還，係咪意味大股東家族非常睇好集團未來發展前景，所以趁股價創新低債轉股，變相增持？
此外，值得留意係，公司第2大股東係曾經被港交所(00388)勒令停牌嘅鼎益豐控股(00612)，公司創辦人隋廣義亦係華音聯席主席，佢因涉嫌操縱股價，正被證監會立案調查。
