【Now財經台】安踏體育(02020)今日(18日)出咗營運數據，安踏品牌及FILA品牌都有增長，今年係奧運年，市場對體育用品嘅需求有增無減，安踏更加係國際奧委會2024年至2027年官方體育服裝供應商，又將會推出NBA球星簽名球鞋「歐文系列」，未來兩季係咪安踏嘅銷售關鍵期？
耀才證券研究部總監植耀輝指，安踏未來兩季銷售及收入增長可能更理想，因為上述因素對第2至第3季嘅銷售有明顯幫助，反而奧運對個別品牌未必有太大貢獻。
此外，大行焦點落喺折扣及庫存上，最新營運數據反映集團產品賣得之餘，又唔需要提供好大折扣優惠，但內地市場消費降級係一大隱憂，植耀輝指，安踏定位比較好，根據公司嘅品牌指引，其中，FILA品牌首季增長差少少已達標，而線上銷售對公司嘅貢獻亦相對大，所以整體銷售情況仍算理想，不過，一旦消費狀況改變，唔排除集團要加大折扣率。
