【Now財經台】安踏體育(02020)今日(26日)中午出咗業績，去年多賺34%，收入增長16％，末期息按年大增60%至1.15港元，毛利率升2.4個百分點至62.6%。至於FILA品牌收入增長16%，集團今年增長動力繼續要睇住FILA？其他品牌如Descente及Kolon Sport可唔可以接力成為新增長動力？
信達國際研究部董事趙晞文指，FILA毛利率係集團咁多個品牌中最高，原因係FILA走中高檔路線，對安踏整體毛利率有好大幫助。睇返過去12至18個月，FILA每季公布嘅流水都跑贏，估計集團今年主要靠FILA及小品牌拉動增長。
股價方面，2月至今已累升約20%，仲有幾多水位？趙晞文認為，安踏4月中會公布第1季流水情況，如果表現比市場預期好，安踏股價有機會再升10%，重返去年第4季高位94元。
