【Now財經台】海底撈(06862)昨日(26日)收市後出咗業績，去年多賺逾2倍至45億人仔，更慷慨地將近90%盈利用嚟派息，末期息按年大增6倍至0.824港元。不過，集團股價暫時連跌3日，今朝平開後，一度跌3%，低見16.44元。
潤淼資產管理董事盧志威表示，海底撈派息比率有驚喜，但難免令市場憂慮集團放棄快速擴張店舖網絡發展策略，繼而影響盈利。William認為，唔需要為咗收息喺現價吸納海底撈，並指集團正由增長股慢慢調整為收息股，中線而言，預期股價會喺14至18元水平上落，不妨等股價再跌多啲先買。
