【Now財經台】截至早上11點，過去1小時內《彭博》用戶搜尋量最多港股，依次為小米集團(01810)，舜宇光學(02382)、海底撈(06862)、港交所(00388)及騰訊控股(00700)。
小米上周五(19日)舉行產品發布會，包括新一代摺機「小米MIX Fold 4」，董事長雷軍預期，可提前喺11月完成SU7全年交付10萬部嘅目標，並有意今年10月喺德國以小米SU7 ULTRA原型車，挑戰跑道上非量產4門電動車最快紀錄，小米係咪可以繼續用電動車業務吸金？電動車估值係咪已反映晒喺股價上？
富昌證券聯席董事譚朗蔚指，小米係採取雙箭頭策略，雖然手機及電動車業務都有利好，但佢覺得手機業務值得更關注，近期市場熱炒iPhone 16消息，雖然同小米冇關，但睇到行業出貨量等數據回暖，小米、華為等大牌子喺內地去貨去得快都會係一個利好因素。
股價方面，小米喺震盪過後依家喺16元水平搵到支持，但市況始終唔係咁穩定，一旦大市回穩，如果一直可以守住16元都值得考慮買入。
電動車業務方面，Stevan又話，小米電動車設計及配置等已公開咗，之前市場掀起搶購潮，但依家已經「攤凍晒」，仍需要有好多實質產銷數據支持，相比之下，佢仍認為，小米汽車呢個因素會略為降溫，短線宜較多關注手機行業回溫情況。
