【Now財經台】截至早上10時45分止，1小時內《彭博》用戶關注度上升最多港股，依次為快手(01024)、恒基地產(00012)、友邦保險(01299)、中金公司(03908)及中國移動(00941)。
今個星期有唔少公司出業績，其中，恒地將會喺周四(21日)放榜，股價今日(18日)顯著受壓，集團最近推出嘅新盤入票反應唔錯，影響二手成交，集團旗下旺角新盤將會今個周末開售，集團股價已連日向下，到底係擔心新盤銷情，還是預期業績唔太理想及影響派息？
富昌證券聯席董事譚朗蔚指，對恒地今日跌咁多都有啲意外，投資者需正視有冇新風險因素，但中線嚟講，恒地及信和置業(00083)走勢係有改善，而前兩日嘅跌幅其實唔算大。
佢又認為，樓市未必一定回升，仍要視乎本地經濟發展情況，睇返過去1星期，資金似乎流入新盤市場，反映政策鬆綁只會帶動交投及買賣轉趨活躍，但唔代表樓市好轉。
