【Now財經台】賣公仔「有錢途」？內地代表泡泡瑪特(09992)旗下「吸金王」Labubu全球爆紅，推高公司收入、盈利及股價，其中，集團股價今年已累升逾3.3倍，更一度挑戰「紅底股」，截至今早(30日)止，公司市值逾1130億元，幾乎同本地地產股恒基地產(00012)嘅逾1140億元平起平坐，反映呢啲公仔「吸金力」驚人。至於喺地球另一邊嘅英國，就有另一個「吸金王」Jellycat。
據英國《金融時報》引述Jellycat嘅財務文件顯示，集團收入喺2013至2022年期間大增約8倍，而係2022年收入高逾14億港元，按年增長逾70%，至於今年平均單價介乎75美元至100美元。
Jellycat喺1999年由兄弟William Gatacre及Thomas Gatacre創立，成立時主攻BB客，走高級毛絨公仔路線，以Soft及Warm做賣點，發展到今日，呢啲兔仔、青蛙、牛油果、蔬菜及廁紙桶等造形毛公仔，更成功俘虜無數成年人，發展成「治癒經濟」。
Jellycat「爆紅DNA」係乜嘢？
1.公仔用極高級物料製成，憑極柔軟及舒服嘅觸感聞名，呢啲物料全部通過嚴格測試，即使買咗好耐及洗過都唔會好快走樣。
2.雖然公仔唔花巧，但「角色」好多，再配上可愛、純真嘅表情，感覺治癒，令大人及小朋友都成為fans。
3.揀咗心水毛公仔付款時，店員會配合返產品「加調味料」及「烹調」，再擺入「外賣盒」(包裝袋)，呢種沉浸式互動Shopping體驗，為人帶嚟一種情緒價值。
4.每個公仔嘅吊牌都寫住「Please look after me」，寓意送比重要嘅人，非常有心思及浪漫。
5.由於係玩具界嘅潮流icon，唔少外國星二代都係呢個品牌嘅fans。
