【Now財經台】iPhone今年首6周喺內地銷量大跌24%，內地市佔率更跌出三甲，排喺Vivo、華為及榮耀之後。有「最強蘋果分析師」之稱的天風國際證券分析師郭明錤指，市場正下調緊iPhone出貨預測，若蘋果公司(Apple Inc.)前景真係轉差，市值縮水，負責製造iPhone鏡頭部分嘅瑞聲科技(02018)，同埋舜宇光學(02382)會唔會受拖累？
元宇證券基金投資總監林嘉麒指，瑞聲係接最多iPhone定單嘅手機設備股，如果作為智能手機龍頭嘅iPhone都唔掂，瑞聲股價好難唔受影響。不過，佢指出，三星電子(Samsung Electronics)同埋銷售大升嘅華為、榮耀，都係舜宇主要客戶，估計呢幾個大客足以撐起舜宇手機鏡頭模組生意，加上預期今年整體手機出貨量增長3%，以及集團主力生產嘅車載鏡頭近期亦有龐大需求，估計舜宇今年業務表現唔會太差。
KK又話，舜宇現價已反映Apple對集團嘅影響，若能嚴守止蝕位45元，仍有一定值博空間。
