【Now財經台】兩大龍頭手機設備股舜宇光學(02382)及瑞聲科技(02018)先後派咗去年成績表，兩者都出現唔同程度嘅倒退，不過，如果拆開上下半年睇，兩家公司去年下半年業績較上半年有改善，其中，瑞聲改善程度又較明顯。
艾德金融董事陳政深指，兩家存在唔少差異，成本控制、客源、業務布局等因素，令兩家公司表現一個天一個地。舜宇主力做光學產品，由於手機相關業務係主要收入來源，所以直接受手機市場疲弱影響。另一方面，多家手機設備製造商撤出內地供應鏈，令作為供應鏈一份子嘅舜宇身受其害，雖然舜宇嘅汽車相關業務錄得增長，但始終佔比唔大，起唔到拉動作用。
瑞聲情況就唔同，手機均價上升，將產品高端化嘅同時，業務發展可以更廣泛，雖然瑞聲以聲學業務為主，但仲有光學、電池傳導等業務，針對車載市場發展推出揚聲器解決方案，走高定位路線，會對毛利率有支持作用。
