【Now財經台】藥明系股份，包括藥明生物(02269)、藥明合聯(02268)、藥明康德(02359)今日(7日)都維持到升勢，但約兩周前，美國或推出生物安全法案嘅消息，一度令藥明系股價暴瀉。
據《路透》報道，法案去年12月20日已交畀參議院，但去到上星期仍未有進展，昨日(6日)話提案延期，今日又話共同發起人人數由6變零，不過，《路透》又指，另一份相關提案兩周前已交畀眾議院，暫時仍有4個人支持。
紅蟻資本投資總監李澤銘指，美國通過法案要一段長時間，期間亦唔會一帆風順，回顧歷史，美國喺大選年都會對中國採取強硬態度，因為要增加國內支持度，由於唔知道會唔會再有法案推出，所以投資者普遍唔會博藥明系冇事。
藥明生物先後用咗逾4億元做回購，藥明康德更用咗10億人仔回購A股，Alan就話，藥明系股價易跌難升，尤其藥明生物只剩返20億至30億元現金，即使用晒所有現金做回購，相信都扭轉唔到股價跌勢，因此，要留意中美關係或法案進展，股價要重返消息公布前水平絕對唔容易。
