【Now財經台】截至早上11時止，1小時內《彭博》全球用戶關注度上升最多首5隻港股，依次為國泰航空(00293)、創科實業(00669)、中遠海控(01919)、萬科企業(02202)、中國石油化工股份(00386)。
國泰近期接連取消航班，今朝(10日)終於話已完成航班整合，逾96%受影響乘客獲安排替代航班。雖然集團喺農曆新年長假期前成功「拆彈」，但股價仍然冇乜起色，今朝輕微低開後，持續偏軟，半日收報8.11元，跌1%。
資深證券分析師彭偉新認為，即使冇咗取消航班呢個負面消息，股價上升空間仍然有限，估計2022年高位頂部，即9.2元水平，係市場預期嘅最終反彈目標，而大行整體目標價8.5至10元亦喺高位附近，好難吸引投資者重新入場。
