【Now財經台】中午內地突然爆出諮詢文件，話要限制網絡遊戲嘅課金系統，監管政策突然180度轉變，搞到騰訊控股(00700)同網易(09999)股價大跳水，騰訊更創逾52周新低。
冠域商業及經濟研究中心主任關焯照重申，千祈唔好掂ATM等重磅科網股，包括阿里巴巴(09988)、美團(03690)，指內地打壓平台經濟超過2年，而目前仍然睇唔到有消停嘅一日，加上當局不斷收緊監管下已經「榨乾」呢類科網股嘅估值，唔可以好似前幾年當佢地係高增長股咁樣炒。
不過，關博士表示，唔少恒指其他成分股表現好過ATM，先撐得住恒指未跌穿16000點，又話即使港股估值平，都唔好只買某幾隻重磅股，要分散投資來減低ATM拖累大市嘅風險，而近日大跌市中可見盈富基金(02800)持倉量愈來愈多。
