【Now財經台】截至早上11時止，1小時內《彭博》用戶關注度上升最多港股，依次為京東集團(09618)、阿里巴巴(09988)、騰訊控股(00700)、美團(03690)、友邦保險(01299)。
京東股價今日愈跌愈多，與此同時，有6至7家大行同時下調京東港股或美股目標價，臨近季績期，近期陸續有券商下調ATM盈測及目標價，但點解京東股價反應特別大？
大華繼顯執行董事梁偉源指，主要係內地整體經濟復甦力仍較弱，之前估計有機會錄得較大增長嘅電商銷售，都受到負面影響，京東之前希望用低價策略擴大市佔率，但近期嘅銷售數字反映策略唔係好有效，搶唔到市佔率之餘，更令利潤受壓，導致大行喺出季績前下調目標價。
佢又話，要再觀察多2至3日，睇下呢浸沽壓可唔可以消化晒，但相信股價落到95元水平，應該會有返少少吸引力令投資者再買入。
