【now.com財經】噚日揀咗隻恒指牛(53066)出嚟，平均買入價為0.048元，落場後見五分鐘圖整條保歷加向下都心知不妙，所以Mark住下半場係搵位褂人。同步Set到最大讓步嘅一條線為小時圖嘅10線，事關出隻(53066)嘅目的都係睇中咗小時圖條「上升通道」啫。
本來下半場返嚟見指數都仲橫行頂得住，但一到咗2點半左右，指數忽然向下落多一步，失守最後防線小時圖10線，(53066)亦要止蝕，以2點30分起計見失守小時圖10線後嘅10分鐘走(53066)，期內高低位做過0.048元/0.046元，平均走貨價為0.047元，對比平均買入價，平均輸一格或2.08%，再加手續費。坦白講，呢注負數彷彿有種解脫嘅感覺，可能真係對住條橫行中嘅恒指對得太耐啦。
至於噚日喺YT講嘅中海油(00883)，仲揀定埋隻海油牛(51492)出嚟，喺【輪證下半Part】講過可以吼返中海油五分鐘圖見Slow STC(14,3)落到超賣水平時作安全Swing出場，不過，睇返中海油全日條Slow STC(14,3)無落過地，即係又係得個睇字，唔緊要，佢唔急我做乜要急。今日或者比較急嘅係時刻留意住天氣，一位被其他職業耽誤嘅天文台台長戰友噚日已經溫馨提示咗眾戰友(包括我)呢個風坐八望九。到今日再Update有可能上10號，皆因佢嘅威力不比當年山竹嘅削。唔怕一萬，最怕萬一，未去到要搶八包8KG米嘅，買多一兩日餸頂一頂OK嘅。
依家9點54分，指數再嚟高開，開市升97點，報18,580點後，恒指有一下再向上衝高至暫時高見18,667點後向下再回番落去開市水平，到依家於五分鐘圖嘅50/100線上企穩稍回，「長方形」開始畫到出嚟。
終於等到10點，見指數喺小時圖上仍然咬得住10線，作戰室第一注好倉爬格仔走唔切嘅，似乎都仲見到爭扎嘅理由。恒指牛(53169)，收回價18,188點，同現價有約380點距離，借小時圖10線有支持而出動隻好倉；反轉番睇五分鐘圖見指數喺大約1855X呢個位都似有支持，進取嘅吼五分鐘圖10/20線有支持就入，安全嘅如常用返Slow STC(14,3)落返去超賣水平而出動。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，努力賺取我家肥貓罐罐。
作戰室免費試用，詳見專頁：https://bit.ly/3uixP4Y
